ماروك24 ميديا – Maroc24media جريدة إلكترونية مغربية لكل ماهو مستجد
متابعة/ماروك24مديا
في واحد من أغرب التصريحات اللي سمعوها ساكنة فاس، خرج المدير العام ديال الشركة المفوض لها تدبير النظافة بمنطقة فاس 2، بتصريح كيخلّي الكتير من علامات الاستفهام!
واش كتعرفو شنو كان الجواب ديالو ملي تسوّل على موعد دخول الآليات الجديدة؟
قال بكل برودة:
> “شوفو مع سي العربي”!
واش معقول شركة خذات صفقة بـ17 مليار سنتيم، كتخلص من فلوس المواطنين، ما قادرة حتى تجاوب على سؤال بسيط؟
فين الشفافية؟ وفين التواصل مع الناس اللي كيعانيو يومياً من مشكل الأزبال والوسخ قدام ديورهم؟
شكون هو “سي العربي”؟
الجواب زاد زاد غموض على غموض…
شكون هو هاد “سي العربي” اللي كيهضر عليه؟ واش هو المسؤول الحقيقي؟ واش هو فوق القانون؟
واش المستقبل البيئي ديال فاس تابع لأسماء ما معروفاش وما كيعرفها حتى حد؟
الناس كيدفعو الضرائب، وكيخلصو الرسوم، باش المدينة تكون نظيفة والعيش يكون مريح.
ماشي باش يسمعو أجوبة بحال “شوفو مع سي العربي”، ويشوفو الأزبال كتكبر والوعود كتتبخر.
فين هي اللجنة اللي خاصها تراقب وتتابع شنو كتدير الشركة؟
واش المجلس الجماعي ساكت؟
وشنو موقف السيد العمدة من هاد المهزلة؟
إذا المدير العام كيرفض يجاوب، والعمدة ساكت، شكون غادي يشرح للمواطنين؟
فاس عرفت تجارب سابقة فالتدبير المفوض خرجات خايبة، والناس ما بغاتش تعاود تشوف نفس السيناريو.
خاصنا شركة مسؤولة، واضحة، وكتحترم الناس اللي كاتخدمهم.
كفى من الغموض!
كفى من اللامبالاة!
المواطن الفاسي ماشي لعبة فإيد المسؤولين، والجواب اللي كيتسناهو هو:
شنو درتو بفلوسنا؟ وفين هي الخدمة؟
لأن فاس، بكل بساطة، تستحق النظافة… وتستحق الاحترام.
