التعددية الحزبية وعلاقتها بالازمة السياسية.

صباحكم سعيد. مؤخرا الكل يتحدث في السياسة، لماذا لا أدلي بدلوي أنا أيضا؟؟
نهضرو شوية على التعددية الحزبية وعلاقتها بالازمة السياسية. المغرب دار التعددية تحت شعار التنوع والاختلاف والغنى الاديولوجي وووو. مزيان في الاختلاف غنى ورحمة. ولكن واش فراسك بلي الهدف الحقيقي هو تشتيت الاصوات بين الاحزاب باش حتا حزب مايحصل على الاغلبية المطلقة ويشكل الحكومة كاملة بوحدو. كيفاش؟
فاش كنحسبو الاصوات كايكون واحد الحزب حاصل على اكبر عدد منها ولكنه معمرو يكون عندو الاغلبية المطلقة لي هي النصف+1 بسبب التعددية والتشتيت. نفترضو عدد المقاعد 100 والحزب الاول عندو 30 اذا مايمكنش يشكل الحكومة حيث خصو كثر من 50. اذا لابد من التحالف مع احزاب اخرى باش يجمع ديك 21. وهنا الطامة الكبرى.علاش؟
حيث أولا: الحزب يتحالف مع حزب اخر مختلف معه تماما في الاديولوجيا والتوجهات(واخا مكاين لا توجه لا اديولوجيا). ويقدر يكونو كايتعايرو ليل نهار.
ثانيا:في حالة رفض الاحزاب التحالف معه قد يضطر للتحالف مع احزاب الفتات لي عندهم مقعد او مقعدين. ماشي مصيبة هادي حزب مجايب والو ويكون عندو وزير فالحكومة. وهادشي وقع فالاستحقاقات السابقة.
ثالثا: احتمال البلوكاج الحكومي الذي تضيع معه مصالح العباد والبلاد.
ورابعا:البرنامج الحزبي مبقا عندو حتا قيمة حيث ولاو شركاء اخرين وكل واحد عندو برنامجو وتصورو وغادي تعطاه حقائب معينة.
وهنا كانهضرو على البرنامج الحكومي لي معندو علاقة بتوجهات الاحزاب بل يبنى بالتوافق بين الجميع حسب ميزانية البلاد والظروف والاولويات وووو
يعني الى قلتي فبرنامجك غادي تزيد ميزانية الصحة ل 20% واخا تنجح مغاديش ديرها حيث ماشي بوحدك وتقدر الحقيبة تكون عند حزب اخر اضافة الى ذلك كاين برنامح حكومي ينسف برنامجك الحزبي حتى وان كانت نيتك فعلا صافية في التطبيق.
الدول المجهدة الواعرة عندهم 2 احزاب ولي نجح كايشد كلشي باش ينزل البرنامج كامل ويتحاسب عليه والبرنامج الحكومي عندهم هو برنامج الحزب الحاكم. فهمتيني ولا لا.
نقطة اخيرة ومهمة جدا جدا: سهل جدا اني نعطي وعود وبرامج وخطط وتصورات. اي واحد فينا يديرها والشفوي ساهل. ولكن السؤال هو مين غادي تحيب الفلوس؟ بغيتي تصلح الصحة والتعليم ووو خاصك الفلوووووس. غادي تقوليا عندنا البحر والشجر والحجر والفوسفاط وووو. مزيااااان الله يزيدنا. ولكن شكون عطاهم ليك ؟؟ غادي دخل الحكومة وغادي تبغي تسن قوانين فالبرلمان باش نتجو الثروة ونستاغلوها ودخل الميزانية. مزياااان. ولكن راك ماشي بوحدك وها لي قلنا فالتعددية والتحالف، راه معاك احزاب اخرى غادا تصوت ضد حيث واكلين وشاربين فهاد الوضع. وهنا غادي نعقب على سي بلافريج، قلتي غادي دير ضريبة على الثروة، مزيان. شكون غادي يصوت عليها فالبرلمان، راك ماشي بوحدك.كاين شي واحد يصوت على خلا دار بوه. مع احترامي الشديد له كرجل صادق ذو مواقف في المستوى.
أي حزب كايطبل ويغيط سولوه مين غادي تجيب الفلوس؟؟؟
كيفما قال احمد السنوسي “بزيز” في إحدى اغانيه الساخرة في التسعينيات :
“التغيير بغا الفلوس وشكون طير الفلوس…. لي سمعنا وكون يتغنى حب وتبن. ياك بلاد المخزن واسعة عريضة وزوينة.”
الحاصول المخزن عارف اش كايدير ومفصل القوانين الانتخابية والحزبية وفق مبدأ التفريق والتشتيت باش يدير الخاطر لكلشي ووحتا واحد ميحكم. وتظل دار لقمان على حالها.
ومن هادشي كاااامل. نفس الاحزاب+ نفس الكمامر+ نفس القوانين الانتخابية =نفس النتيجة (دخل تسمان وسكت)
والراس لي مايدور كدية.
هذا جزء من الازمة فقط.
تحياتي